Çул-çӳрев йĕркине пăхăнманнисем нумаййипе час-часах аварисем пулаççĕ, вĕсене пула çынсем сусăрланаççĕ е пурнăçран уйрăлаççĕ. Статистика кăтартăвĕ тăрăх, пĕлтĕр республикăра водительсем çуран çӳрекенсене таптанă 735 тĕслĕх пулнă. Кăçал çулталăк пуçланнăранпа 50 çын инкеке лекнĕ. Вокзал çывăхĕнче час-часах çуран çӳрекенсем палăртнă вырăнсенче мар, ăçта килчĕ унта çул урлă каçаççĕ. Акă Трактор тăвакан проспектĕнче пĕр арçын икĕ ывăлне симĕс çутă çутăлса ĕлкĕреймесĕрех çул урлă ертсе каçма тытăннă. Пĕр ывăлĕ ашшĕне хĕрлĕ çутă чухне каçма юрамасть тесе асăрхаттарса та пăхнă,анчах кăлăхах - ашшĕ итлемен. Водитель те йĕркене пăсса хĕрлĕ çутă чухне чарăнса тăмасăр малалла талпăннă. Çавна пула икĕ ача пульницана лекнĕ. Алексей Смирнов хăйĕн пурнăçĕнче кун пек инкек сахал мар курнă. Çынсем харпăр хăйне тата ыттисене хисеплеме вĕренмесĕр инкексен шучĕ чакасса шанма хĕн, теççĕ инспекторсем. Руль умĕнче ларакан çуран çӳрекене палăртнă вырăнта ирттерсе ямарĕ пулсан, йĕрке хуралçисем кун пирки тӳрех дежурнăйсене пĕлтерме ыйтаççĕ. Пĕлтĕр пурнăçран уйрăлнă 100 çынтан 90-шĕ машина айне каçхине, тĕттĕм чухне лекнĕ. Çавăнпа та инкеке лекес мар тесен водительсен те, çуран çӳрекенсен те, уйрăмах каçхине, яланах тимлĕ пулмалла. Чăваш Ен кăларăм валли Олеся Русакова, Альберт Ильин, Виктор Степанов. chuvashia.rfn.ru